'राज्यात होणार लवकरच मोठा राजकीय विस्फोट'

अहिल्यानगर: प्रतिनिधी

महायुतीच्या मित्र पक्षांमध्ये मोठ्या प्रमाणावर खदखद निर्माण झाली असून राज्यात लवकरच मोठा राजकीय विस्फोट झाल्याशिवाय राहणार नाही, अशी भविष्यवाणी काँग्रेसचे ज्येष्ठ नेते बाळासाहेब थोरात यांनी माध्यमांशी बोलताना व्यक्त केली आहे.

शिंदे गटाच्या मंत्र्यांनी मंत्रिमंडळ बैठकीवर घातलेला बहिष्कार, उपमुख्यमंत्री एकनाथ शिंदे यांनी थेट गृहमंत्री अमित शहा यांच्याकडे केलेली भारतीय जनता पक्षाचे प्रदेशाध्यक्ष रवींद्र चव्हाण यांच्या विरोधातील तक्रार, या घटना सामान्य नाहीत. महायुतीमध्ये मोठ्या प्रमाणावर खदखद आहे, असे थोरात म्हणाले.

महायुतीच्या घटक पक्षांमध्ये मोठ्या प्रमाणावर वाद-विवाद सुरू आहेत. या सर्व घटना ही केवळ सुरुवात आहे. मुंबई महापालिकेच्या निवडणुकीपूर्वीच राज्याच्या राजकारणात मोठी उलथापालथ झाल्याशिवाय राहणार नाही, असा दावा थोरात यांनी केला आहे.