लोणावळा नगराध्यक्षपद अनुसूचित जातींसाठी राखीव; अशोक मानकर आघाडीवर इच्छुक

वडगाव मावळ (प्रतिनिधी) – लोणावळा नगरपरिषदेचे नगराध्यक्षपद यंदा अनुसूचित जाती (एससी) प्रवर्गासाठी राखीव ठरले असून, या पार्श्वभूमीवर सुशिक्षित आणि अनुभवी उमेदवार अशोक मानकर हे इच्छुक म्हणून आघाडीवर असल्याची चर्चा राजकीय वर्तुळात सुरू आहे.

अशोक मानकर हे चर्मकार समाजाचे सामाजिक व शैक्षणिक क्षेत्रात सक्रिय कार्यकर्ते आहेत. आमदार सुनील शेळके यांच्या मार्गदर्शनाखाली त्यांनी अनेक समाजोपयोगी आणि विकासात्मक उपक्रम राबविले आहेत. प्रशासकीय कामाचा अनुभव तसेच लोकप्रतिनिधी म्हणून त्यांनी प्रभावीपणे जबाबदाऱ्या पार पाडल्या आहेत.

शहराच्या सर्वांगीण विकासासाठी दूरदृष्टी, प्रामाणिकता आणि समर्पणाने कार्य करणारा चेहरा म्हणून अशोक मानकर यांची ओळख झाली आहे. शहरातील नागरिकांमध्ये त्यांच्याबद्दल चांगला विश्वास असून, विकासाच्या दृष्टीने त्यांचे योगदान उल्लेखनीय राहिले आहे.

तब्बल तीस वर्षांनंतर नगराध्यक्षपद अनुसूचित जाती प्रवर्गासाठी राखीव झाल्याने या प्रवर्गातील अनेक इच्छुक उमेदवार रिंगणात उतरण्याची शक्यता आहे. मात्र, सुशिक्षित व अनुभवी नेतृत्व म्हणून अशोक मानकर यांच्याकडे मतदार व नागरिकांचे लक्ष वेधले जात आहे.

हे पण वाचा  'चित्रपटाचा आनंद लुटण्यासाठी दृष्टी विकसित करणे गरजेचे'

सन १९९६ नंतर प्रथमच २०२५ मध्ये अनुसूचित जाती प्रवर्गासाठी नगराध्यक्ष पद राखीव झाले असून, या निमित्ताने सामाजिक दृष्ट्या कार्यरत असलेल्या नेतृत्वाला संधी मिळणार आहे. लोणावळा शहराच्या विकासासाठी सक्षम, पारदर्शक आणि संवेदनशील नेतृत्वाची गरज असल्याचे नागरिकांचे मत असून, अशोक मानकर हे त्या दृष्टीने योग्य उमेदवार म्हणून समोर येत आहेत.